زى العصافير.. قصيدة عامية لـ رائد لطفى

0 تعليق ارسل طباعة تبليغ حذف

زى العصافير

بتروح عشمانة فى اللى خالقها

وترجع آخر اليوم شبعانة

بروح لك أنا يوماتى حزين

وأرجع فرحان بداوى فاللى لسه حزانة

بروح لك فقران بلعن حظى

وأرجع بتمخطر ولا أحلاها أمير

 

برمى عليكى هموم وهموم

وعلى أيديكى وحدها بيجينى النوم

ومهما أطلب وأتشرط

لا تقولى مافيش ولا تقولى كتير

 

ولما تعيكى الأحزان

وينوح قلبك اللى قسماه على ألف مكان ومكان

أجرى عليك زى المجنون

وأدعى ما يعرف الدمع عينيكى الحلوين

وأحلف ما تدور الأرض قبل ما تقولى آمين

 

ومن تانى أقطع لك وعد وألف يمين

لو حن عليا زمانى

وحقق لى فى يوم أحلامى

لأفرش قدامك الأرض حرير

و دهب وحلقان مالها نظير

ونعيش أنا وأنتى خاليين البال

و لو بأيديا كنا نعيش وسط العصافير

 

زى العصافير

بتروح عشمانة فى اللى خالقها

وترجع آخر اليوم شبعانة

بروح لك أنا يوماتى حزين

وأرجع فرحان بداوى فاللى لسه حزانة

بروح لك فقران بلعن حظى

وأرجع بتمخطر ولا أحلاها أمير

هذا المقال "زى العصافير.. قصيدة عامية لـ رائد لطفى" مقتبس من موقع (عين) ,ولا يعبر عن سياسة الموقع أو وجهة نظرة بأي شكل ,وأنما تقع المسئولية الخبر أو صحتة على مصدر الخبر الأصلى وهو عين.

أخبار ذات صلة

0 تعليق