الخطيب يستعين بأدمن صفحات السوشيال ميديا في المركز الإعلامي للأهلي.. والراتب؟!

0 تعليق ارسل طباعة تبليغ حذف

في واحدة من المفاجآت الكبيرة، استعان محمود الخطيب رئيس النادي الأهلي، بمشاهير السوشيال ميديا من جمهور النادي للعمل في المركز الإعلامي للأهلي مقابل 3000 جنيه شهريًا.

وتأتي رغبة الخطيب في الاستعانة بنجوم السوشيال ميديا من الجماهير، من أجل تهدئة الجماهير على أية أخطاء يرتكبها المجلس، فضلًا عن كونهم قوة دفاعية وراء المجلس في أي أزمة أو مشكلة تواجه مجلس بيبو.

الاستعانة بالسوشيال ميديا يتم منذ أيام الحملة الانتخابية للخطيب، ولكن الأيام الماضية شهدت تواجدهم بالمركز الإعلامي للنادي وقناة النادي الأهلي بعقود رسمية ومرتبات شهرية.

مصدر بالأهلي زعم في تصريحات لـ“القاهرة 24” أن سبب هجوم شريف جمعة، أحد جمهور السوشيال ميديا مؤخرا على مجلس بيبو، يأتي بسبب عدم تعيينه في المركز الإعلامي برفقة أدمن صفحات السوشيال ميديا براتب شهري 3000 جنيه.

ووجه شريف جمعة أحد أبرز جمهور الأهلي على السوشيال ميديا، اتهامات عديدة لمجلس إدارة النادي الأهلي برئاسة محمود الخطيب، مشددا على أن المجلس باع جمهوره، حيث تمت ملاحقة الجمهور بعد الهجوم على تركي آل الشيخ رئيس هيئة الترفيه السعودية مالك نادي بيراميدز، دون أن يحرك مجلس بيبو ساكنا.

جمعة كتب: “والله ربنا مش هيسامحكم ولا يكرمكم استغليتوا الناس واستخدمتونا ودخلتونا في حرب اتقتلتنا فيها ، اللي اتسجن واللي اتسحل واللي اتأذى فى أكل عيشه واللي اتقفل حساباته لمجرد إننا مستحملناش يتقال عليكم حرامية وأقزام ومُرتشين وفي عز ما تركي قال معركتي مع المجلس مش مع النادي الأهلي وجمهوره قولنا لاااااااا ومليوووون لاااااا اللي هيرشهم بالميا هنرشه بالدم دول رموز الأهلي”

  • لكن للأسف طلع كل ده كدب ومتاجرة على طريقة صدر الناس يطلع ديك أبوها وإحنا حبايب ومحدش شايف حاجة ، نتكلم ونتقابل ونتصور ونظبط بزنس خاااااص أقسم بالله بزنس خااااص ، وفيها إيه لو طلعنا شكرنا في تركي وتجربة بيراميدز العظيمة زي ما باشا المجلس “العامري فاروق” عمل أو قعدنا واتسحرنا وضحكنا واتصورنا زي ما الدرندلي عمل وأهو من جاور السعيد يسعد وياسيدي لما تركي ينزل اسكرين للعامري وهو بيشكر تجربته في مصر إرمي العيال بتوع الـ٣٠٠٠ جنية في الشهر يقولوا “فبركة” بس العامري نفسه مينفيش وميقدرش ينكر وياسيدي لما ينزل صورة الدرندلي وهو سهران معاه إبقى خلي الجروبات بتاعة الـ٣٠٠٠ جنية لكل أدمن يقولوا لاا لا دي صدفه ماشي راح متكعبل وقع في الحفلة بيقوم راح ناطط علي رجل تركي بيبص بوقه إبتسم لوحده ولزق فيه واتاخدت الصورة وبرضو الدرندلي ميقدرش ينكر أو يطلع يقول احرجني وأهو اللي عدى حوار العامري يعدي حوار الدرندلي والجماهير يطلع ديك اللي جابها عادي.
  • هحكيلكم موقف يعلمه ناس كتير داخل الأهلي وعاشوه معايا دقيقة بدقيقة يبين أد إيه أنا كنت عبييييط حسبي الله ونعم الوكيل ، لما “تركي آل الشيخ” طلع قال على مجلس إدارة الأهلي حرامية وأقزام ومُرتشين وسرقوا فلوس العمال الغلابة والخطيب خد فلوسه يجهز بيها شقته في الإمارات وإنهم على تواصل معاه حتى الآن دمي إتحرق وطلعت عملت فيديو لف مصر كلها تحت عنوان “الخطيب ومجلسه أشرف منك ورقبتي فدا الخطيب”
  • مفيش ٢٤ ساعة كنت مطلوب “أمنياً” وكل الأماكن اللي بتردد عليها متقفله من شبرا لغاية بلدي سنهوت في الشرقية لحد مايجيبوني وجابوني فأنا بمنتهى السذاجة روحت متصل بواحد من المجلس بااااشا المجلس بتاعهم كنت فاكره راجل محترم مش خاين وقولتله يافندم أنا اتاخدت دلوقتي بعد الفيديو اللي دافعت فيه عن المجلس ضد شتيمة وإهانة وإتهامات تركي آل الشيخ ليكم لو سمحت حاول تساعدني أنا فعلاً في ورطة وكارثة وكل اللي عملته دفاعي عن رموز الأهلي ، راح رادد عليا البااااشا قالي وأحنا مالنا إنت مختل في مخك حد قالك دافع ولا اتنيل إنت شخص مش طبيعي حد يحط نفسه في النار عشان حد ياسيدي هو قال على الخطيب حرامي والخطيب نفسه سكت ومردش ترد إنت وتعمل حامي الحمى وأقسم بآيات الله بالحرف والكلمة وراح قافل السكة في وشي وشهادة لله لولا كرم ربنا يا عالم كان حصلي إيه.
  • أخيراً لا الخطيب هيطلع يستنكر أو ياخد قرار ولا العامري هيطلع يقول بم ولا الدرندلي هيقول تركي أحرجني وأنا غلطت ولا حد هيفتح بوقه بكلمة عارفين هيعملوا إيه ؟ هيخلوا الجروبات القذرة أم ٣٠٠٠ جنية للأدمن الواحد تبعت ناس هنا دلوقتي يقولوا إنت بتحارب المجلس ليه وتشتمك إنت وناس تانية منهم هتقولك وفيها ايه صدفة عادي ، وناس تالتة منهم برضو هتقولك تركي عاوز يوقع المجلس بالصورة دي دول أعظم مجلس وناس رابعة هتقولك عديها إحنا عندنا دوري وكل دول الأهلي برئ منهم وحق الله حسبي الله ونعم الوكيل فيكم علي الناس اللي اتسجنوا واللي اتهانوا واللي خسروا شغلهم واللي أهاليهم صابها المرض من الزعل عليهم واللي بيدجاتهم اتقفلت والله الواحد فوض أمره لله فيكم بحق الشهر الكريم ده.

هذا المقال "الخطيب يستعين بأدمن صفحات السوشيال ميديا في المركز الإعلامي للأهلي.. والراتب؟!" مقتبس من موقع (القاهرة 24) ,ولا يعبر عن سياسة الموقع أو وجهة نظرة بأي شكل ,وأنما تقع المسئولية الخبر أو صحتة على مصدر الخبر الأصلى وهو القاهرة 24.

أخبار ذات صلة

0 تعليق